திருத்தலச் சிறப்புகள்: பழ ஆறு என்பது விநாயக தீர்த்தம் ஆகும். வசிட்டர் அனுமன், இந்திரன் முதலியோர் வழிபட்ட தலம் இது. திருஞானசம்பந்தர் சுந்தரர் பாடல் பெற்ற காவிரி வடகரைத் தலம். இத்தலம் மேலைக்காழி, தலைஞாயிறு என்று வழங்கப்படுகிறது. ஊரின் பெயர் கருப்பறியலூராக இருப்பினும், கோயில் பெயர் கொகுடிக்கோயில் என்று வழங்கப்படுகிறது. முல்லைக் கொடியை தலப்பெயராக கொண்டமையால் இப்பெயர் பெற்றது என்பர் சிலர்.

சூரியன் வழிபட்டதால் தலைஞாயிறு எனவும், சீர்காழிக்கு மேற்கில் உள்ளதால் மேலைக்காழி எனவும் பெயர் பெற்றது. சீர்காழியைப் போன்று மேல் தளத்தில் தோணியப்பர் அம்பிகையோடு எழுந்தருளியுள்ளார். அங்கிருந்து படியேறிச் சென்றால் சட்டைநாதர் சந்நிதியைத் தரிசிக்கலாம். இத்தலத்தில் விநாயகர், முருகர், உமாமகேசுவரர், நடராஜர் முதலிய சந்நிதிகள் உள்ளன.

இந்திரன் ஒருமுறை கயிலாயத்திற்கு இருமாப்புடன் சென்றார். அவர் முன் பூதவடிவில் இறைவன் தோன்றினார். அதை அறியாத இந்திரன் தனது வச்சிராயுதத்தை அவர்மீது எறிந்தார். அதன்பின் இறைவன் என்பதை அறிந்து தன் பிழை பொறுக்க வேண்டினார். அதை பொறுத்த காரணத்தினால் இறைவன் 'குற்றம்பொறுத்தநாதர்' என்று அழைக்கப்படுகிறார்.