HolyIndia.Org
Holy India Org Add New Temple

தேவாரம்பாடல்எண்[1-8250*] கோயில் : [1-275] வார்த்தைதேடல்

1-2/2464
பட்டம் பால்நிற மதியம் படர்சடைச் சுடர்விடு பாணி 
நட்டம் நள்ளிரு ளாடும் நாதனார் நவின்றுறை கோயில் 
புட்டன் பேடையோ டாடும் பூம்புக லூர்த்தொண்டர் போற்றி 
வட்டஞ் சூழ்ந்தடி பரவும் வர்த்தமா னீச்சரத் தாரே.

2-2/2465
முயல் வளாவிய திங்கள் வாண்முகத் தரிவையில் தெரிவை 
இயல் வளாவிய துடைய இன்னமு தெந்தையெம் பெருமான் 
கயல் வளாவிய கழனிக் கருநிறக் குவளைகள் மலரும் 
வயல் வளாவிய புகலூர் வர்த்தமா னீச்சரத் தாரே.

3-2/2466
தொண்டர் தண்கயம் மூழ்கித் துணையலுஞ் சாந்தமும் புகையுங் 
கொண்டு கொண்டடி பரவிக் குறிப்பறி முருகன் செய்கோலங் 
கண்டு கண்டுகண் குளிரக் களிபரந் தொளிமல்கு கள்ளார் 
வண்டு பண்செயும் புகலூர் வர்த்தமா னீச்சரத் தாரே.

4-2/2467
பண்ண வண்ணத்த ராகிப் பாடலொ டாட லறாத 
விண்ண வண்ணத்த ராய விரிபுக லூரரோர் பாகம் 
பெண்ண வண்ணத்த ராகும் பெற்றியொ டாணிணை பிணைந்த 
வண்ண வண்ணத்தெம் பெருமான் வர்த்தமா னீச்சரத் தாரே.

5-2/2468
ஈசன் ஏறமர் கடவுள் இன்னமு தெந்தையெம் பெருமான் 
பூசு மாசில்வெண் ணீற்றர் பொலிவுடைப் பூம்புக லூரில் 
மூசு வண்டறை கொன்றை முருகன்முப் போதுஞ்செய் முடிமேல் 
வாச மாமல ருடையார் வர்த்தமா னீச்சரத் தாரே.

6-2/2469
தளிரி ளங்கொடி வளரத் தண்கயம் இரிய வண்டேறிக் 
கிளரி ளம்முழை நுழையக் கிழிதரு பொழிற்புக லூரில் 
உளரி ளஞ்சுனை மலரும் ஒளிதரு சடைமுடி யதன்மேல் 
வளரி ளம்பிறை யுடையார் வர்த்தமா னீச்சரத் தாரே.

7-2/2470
தென்சொல் விஞ்சமர் வடசொல் திசைமொழி யெழில்நரம் பெடுத்துத் 
துஞ்சு நெஞ்சிருள் நீங்கத் தொழுதெழு தொல்புக லூரில் 
அஞ்ச னம்பிதிர்ந் தனைய அலைகடல் கடைய அன்றெழுந்த 
வஞ்ச நஞ்சணி கண்டர் வர்த்தமா னீச்சரத் தாரே.

8-2/2471
சாம வேதமோர் கீத மோதியத் தசமுகன் பரவும் 
நாம தேயம துடையார் நன்குணர்ந் தடிகளென் றேத்தக் 
காம தேவனை வேவக் கனலெரி கொளுவிய கண்ணார் 
வாம தேவர்தண் புகலூர் வர்த்தமா னீச்சரத் தாரே.

9-2/2472
சீர ணங்குற நின்ற செருவுறு திசைமுக னோடு 
நார ணன்கருத் தழிய நகைசெய்த சடைமுடி நம்பர் 
ஆர ணங்குறும் உமையை அஞ்சுவித் தருளுதல் பொருட்டால் 
வார ணத்துரி போர்த்தார் வர்த்தமா னீச்சரத் தாரே.

10-2/2473
கையி லுண்டுழல் வாருங் கமழ்துவ ராடையி னாற்றம் 
மெய்யைப் போர்த்துழல் வாரும் உரைப்பன மெய்யென விரும்பேற் 
செய்யில் வாளைக ளோடு செங்கயல் குதிகொளும் புகலூர் 
மைகொள் கண்டத்தெம் பெருமான் வர்த்தமா னீச்சரத் தாரே.

11-2/2474
பொங்கு தண்புனல் சூழ்ந்து போதணி பொழிற் புகலூரில் 
மங்குல் மாமதி தவழும் வர்த்தமா னீச்சரத் தாரைத் 
தங்கு சீர்திகழ் ஞான சம்பந்தன் தண்டமிழ் பத்தும் 
எங்கும் ஏத்த வல்லார்கள் எய்துவர் இமையவ ருலகே.
Thiruvidaivoi