HolyIndia.Org
Holy India Org Add New Temple

தேவாரம்பாடல்எண்[1-8250*] கோயில் : [1-275] வார்த்தைதேடல்

1-3/2998
எரிதர அனல்கையில் ஏந்தி எல்லியில் 
நரிதிரி கானிடை நட்டம் ஆடுவர் 
அரிசிலம் பொருபுனல் அம்பர் மாநகர்க் 
குரிசில்செங் கண்ணவன் கோயில் சேர்வரே.

2-3/2999
மையகண் மலைமகள் பாக மாயிருள் 
கையதோர் கனலெரி கனல ஆடுவர் 
ஐயநன் பொருபுனல் அம்பர்ச் செம்பியர் 
செய்யகண் ணிறைசெய்த கோயில் சேர்வரே.

3-3/3000
மறைபுனை பாடலர் சுடர்கை மல்கவோர் 
பிறைபுனை சடைமுடி பெயர ஆடுவர் 
அறைபுனல் நிறைவயல் அம்பர் மாநகர் 
இறைபுனை யெழில்வளர் இடம தென்பரே.

4-3/3001
இரவுமல் கிளமதி சூடி யீடுயர் 
பரவமல் கருமறை பாடி யாடுவர் 
அரவமோ டுயர்செம்மல் அம்பர்க் கொம்பலர் 
மரவமல் கெழில்நகர் மருவி வாழ்வரே.

5-3/3002
சங்கணி குழையினர் சாமம் பாடுவர் 
வெங்கனல் கனல்தர வீசி யாடுவர் 
அங்கணி விழவமர் அம்பர் மாநகர்ச் 
செங்கண்நல் இறைசெய்த கோயில் சேர்வரே.

6-3/3003
கழல்வளர் காலினர் சுடர்கை மல்கவோர் 
சுழல்வளர் குளிர்புனல் சூடி யாடுவர் 
அழல்வளர் மறையவர் அம்பர்ப் பைம்பொழில் 
நிழல்வளர் நெடுநகர் இடம தென்பரே.

7-3/3004
இகலுறு சுடரெரி இலங்க வீசியே 
பகலிடம் பலிகொளப் பாடி யாடுவர் 
அகலிடம் மலிபுகழ் அம்பர் வம்பவிழ் 
புகலிடம் நெடுநகர் புகுவர் போலுமே.

8-3/3005
எரியன மணிமுடி இலங்கைக் கோன்றன 
கரியன தடக்கைகள் அடர்த்த காலினர் 
அரியவர் வளநகர் அம்பர் இன்பொடு 
புரியவர் பிரிவிலாப் பூதஞ் சூழவே.

9-3/3006
வெறிகிளர் மலர்மிசை யவனும் வெந்தொழிற் 
பொறிகிளர் அரவணைப் புல்கு செல்வனும் 
அறிகில அரியவர் அம்பர்ச் செம்பியர் 
செறிகழல் இறைசெய்த கோயில் சேர்வரே.

10-3/3007
வழிதலை பறிதலை யவர்கள் கட்டிய 
மொழிதலைப் பயனென மொழியல் வம்மினோ 
அழிதலை பொருபுனல் அம்பர் மாநகர் 
உழிதலை யொழிந்துளர் உமையுந் தாமுமே.

11-3/3008
அழகரை யடிகளை அம்பர் மேவிய 
நிழல்திகழ் சடைமுடி நீல கண்டரை 
உமிழ்திரை யுலகினில் ஓதுவீர் கொண்மின் 
தமிழ்கெழு விரகினன் தமிழ்செய் மாலையே.
Thiruvidaivoi